AKTUELL
Ma(n Bou håut gheiat!
( Feuilleton)
Måla Richard
´S is üwahaupt niat lång
her, åls i(ch mit meinam Wei(b in meina(r Hoimatkirchn g´ståndn bin
u unna Pfårra Pesek håut uns dian Segn gebn. I(ch denk, dass nua a
weng Gouha vargånga san u aframål stäi(h i in derselbn Kirchn u
schau zou, wöi ma älteste(r Bou Richard vuarm glåichn Åltar stäiht
u dian Segn aa kröigt. Vuar fünfundzwåzich Gouhan ho(b i(ch mit meina
Irene gånz hässlichas Wetta g´hått. Es woar Ende Oktober, kålta
Wind håut pfiffn u g´regnt håuts aa. In dian fünfundzwanzich
Gouhan is aa vüll påssiert: drei Kinna håut uns unna Hergott gebn,
u miar ho(b)n a schäins Lebn darlebn kinna. Döi letztan fünfzehn Gouha
ho(b)ma mit unnaran Kinnan unna Leben mit Eghalåndan varbundn. Miar ho(b)n
niat nu unna Eghalåndtum im Eghalånd darhåltn, miar ho(b)n aa
vüll Kameraden in Deitschlånd kröigt. Und zwoar döi bestn Freundn kua(r
i(ch heint an dian wichtichn Tågh sea: P. Norbert,
dian Visitator füar ålla Sudetendeutschen und Karl- Heinz as Wåssaalfingen.
´S is gånz schäi(n, das ma sua gåuta Freunde håut u daß sie
kumma san. “Da Richard håut mi(ch vüll Gouha am Åltar däint u
sua mou i(ch aa kumma, wenn er mi(ch braucht“, håut da P.
Norbert g´sågt. Es woar a schäina halicha Mess. Unna Pfårra
Liska mit P. Norbert hå(b)m´s schäi(n feierlich g´måcht u i(ch
ho(b aa schäin mit dian Weihrauch „herumpfuchtelt“, damit döi vüll Leit,
döi zam erstnmål innara Kirchn kumma san, aa woos davua ho(b)n. Nåuch
dian „doppeltn“ Segn semma dånn assi gånga u unnåra zwou
Mittånzerinen in eghalånda Tracht ho(b)n dian gungan Ehepår Blöimla
afn Wegh gstraat. Festlicha B(i)ldla ho(b)ma dånn im Schluaßpårk in
Proitnstua g´måcht, wou i(ch åls Kind g´spüllt ho(b. Su is holt
´s Lebn: es rennt u rennt u affaramål is ma Nuana uwa a Wawa u ma merkt,
dama ålt is. Es gäiht nur darum, ob ma dån vuarm Herrgott sågn
kua: „I(ch ho(b fei(n scho a g´scheits Lebn g´föiat!“
|
|
|
|
|
|
|
|
|