S Vüachala am Christbaam
S Vüachala am Christbaam
Mala Richard
Dös Gschichtl woos i heint dazühln w(ü)ll, haut scho vuar achtzig Gauhan uagfanga. Es woar in Gablonz, als um alla Halichan a alta Deitscha Glasmacha dian letzn Auftragh üwa dian schäinan Schmuck füar´d Christbaama gmacht hatt. Ear woar scho alt uwa waal sa ganzn Familie recht arm woar, haut er sua lang g´awart bis es nimma ganga is. Es woar am Freita Nammitogh, als ear sa letztas "Stückl" in d´Kist(a)n aag´legt hatt: Es woar a schäins, kloins Vüachala, dös dian Kinnan in reichn Familien zu Weichnachtn Freid machn sollt. Mit vüll Löi(b haut ear dös zerblechliche Wesn einglegt u sa Augn ho(b)m a poar Tropfn oini glaua, af dös kloina Vüachala, woos za seinam letztan Werk wuarn is.
Döi Kistan is affa af´m Bahnhuaf kumma u haut sich af´n langan Wegh gmacht. Uakumma is es in Egha, in oinam schöinan G´schäft. Dös Vüachala is mit annaran schäinan Sachn ins Schaufensta eini kumma. Dös woar direkt af´m Marktplatz und sua haut dös Vüachala vüll g´seah: Döi arman Kinna, döi Stundnlang vuar dian Fenster g´standn san u ho(b)m mit nassn Augn döi Pracht uagschaut. Es haut döi vüll Leit g´seah, döi af´m Christkindlmarkt aakafn woarn u es haut aa vüll Betla gseah, döi frouch woarm wenn sie woos warms zan Essen kröigt ho(b)m. Nauch Halichaumd is a weng staada wuarn. Af dian Straußn san nimma sua vüll Leit ümg´laffn u ins G´schäft is aa nöimatz kumma. Nauch halichan drei Könighan ha(b)m möin döi schäinan Sachn weg. U unna Vüachala is wieda in oina Kistan eini kumma. Dös Gauha woar ganz gout u es san vüll döi schäinan Sachn vakaaft wuarn. Dös oina Vüachala uwa woar vöi vazaubat: jeda haut es uagschaut, uwa wenn´s zan kafn kumma is, haut sich dös jeda annarscht üwalegt. Kua sa(n, daß jeda in dian Augn van dian Vüachala nu(ch döi nassan Augn van dian Glasmacha gseah haut.
Und sua is dös üwa zwanzig Gauha ganga. Es woar vor Weihnachtn im Winter 1940, als sich dös Schicksal van dian kloinan Vüachala g´ändat hatt. Im östlichen Eghaland, bei Malas af´m Plachtin, is d´"Mala Frieda" 10 Monate alt wuarn. "Woißt woos," haut döi Mala Wawa za seinam Mua gsagt, "machma doch heia a weng schäinaran Christbaam. D´ Resl is aloi(n u miar solln doch aramal a dian Kinnan Freid machn!" Da Mala Wenz woar Musikant u a lustigha Kerl: "Woißt woos, Wawa, wenn i schu woos gschaits kafn soll, foar i direkt nauch Egha!"
U wöi´s ebn in Gschichtlan sua is, is da Mala Wenz in Egha grad in dös Gschäft eini kumma, wou dös Vüachala scho ganz vazweifelt im letzten Eck g´standn is. I kua hait nimma soghn, ob dös döi Ostsee woar, wou da Vatta van da Frieda g´döint haut. Döi haut nämli(ch aa sua gsalzanas Wassa, wöi da Trenna vam Glasmacha seina Augn. Oins is owa gwiss: am nächsten Tagh woar da zerblechliche Schmuck af´m Plachtin.
Da Halichaubmd woar in dian Kröichsgauha doch a weng schänna: Döi Föichtn woar sua, wöi alla döi Gauha z´voar, uwa dös Vüachala haut dös Fest Geburt Christi vüll schänna G´macht. Dös Vüachala haut affa aa vüll Schlimmas darlebn möin: Da Kröich woar aas, da Vatta van da Frieda is gfalln u d´Malas go(b)m möin van ihram Haus weg. Vüll ho(b)m si kinna niat mitnemma, uwa füar dös Vüachala ho(b)m sie doch an Platz g´f unna. Nauch poar Gauhan ho(b)n sie kinna wieda in ihr Haus zurückkumma. Es woar ihr Haus, owa es woar halt nimma sua, wöi in dian altn Zeitn. Da ersta Winta bei "Malas" nauch dem Kröich woar wieda dau: "Woißt woos, Wawa, heia hol i an groußan Baam" haut da Mala Wenz g´sagt. U wöi ear dös varsprachn haut, sua haut ear aa dös g´macht. Niat weit wegh van da "Weska" haut ear suara schäina Föichtn mit Hamm gnumma u dös schmückan is louß ganga. Als dann döi Kinna zam Christbamm kumma san, woar dös dös kloina Vüacharla as Glas, woos af uamal greina uagfanga haut: "I ho(b scho allahand darlebt, uwa öitza woiß i, woos es hoißt daham za saa!"
