Bleigöißn im Eghaland
Bleigöißn im Eghaland
Moala Richard
Uwa dös "Bleigöißn" z´Weihnachtn ho(b i imma nua g´lesn. Füar unnara Adventsfeia in Netschetin haut uwa mei(n Wei(b g´meint, miar solln döi altn Sittan wieda lebendich machn.
Uwa ´s woar niat nuar dös "Bleigöißn", woos ma an diam Na(ch)mitagh g´macht ho(b)m:
"S ´Schouchschmeißen" woar aa dabaa!
Woos woar am 6. Dezemma in Netschetin üwa(r)haupt lauß?
Wöi alla döi Gauha z´viar, ho(b)ma in unnara Netschetiner Ortsgruppn van "Bund der Deitschn - Landschaft Eghaland" Advenstfeiar g´feiat. Miar woarn üwa dreißig Leit, döi nauch Netschetin kumma san. Nauch da Begröißung is za uns da "halicha Mua" kumma: da Niklas. U mit ihm aa a schäina Engl u a groußa schwoarza Teifl!
D´ Kinna ho(b)m G´dichtla affgsagt u d`Berti haut zam erstnmal af d´Zither vor d´Leitn "Stille Nacht, heilicha Nacht" gspült. Schöi(n aafpaßt haut da "Bachmann Schorsch", dear as Prohorsch kumma is.
Nauch Gedichtn und Gsang san döi Sittan lausganga. Bam "Schouchschmeißn" woar unna Resl dabaa, sua wöi döi annara Resl van unnaram Richard u va meinan Schwesta woar döi Renate dabaa.
Alla ho(b)m döi d´Schouch hinta sich g´schmissan, uwa kua Schouch haiut mittara Spitzan Richtung Tür zeigt. Am meistn haut sich ma Tochta gfraat: "Ha, ha, i tau fei(n heia nu niat heian!"
Vül interessanta woar dös "Bleigöißn": wau soll´ma heint üwahaupt s´Blei gröign?
Gott sei Dank ho(b i in oinam "Supermarket" döi G´wichta zam "Fischfanga" g´fundn u dös "Bleigöißn" is lausganga. I ho(b döi kloinan Gewichta in a "Schöpflöffl" einitaun, u mittara Kerz uagwärmt, uwa es haut niat funktioniert. Miar ho(b)m dann unnara Wirtin um Hilfe g´betan. Af´m Gasherd in da Küchan is dös Blei endlich zam "laffan" kumma. Schnell in oinan "Küwl" mit Wassa schmeisn u fertig woar dös Schicksal va meinam Wei(b.
Woos owa assi kumma is, dös haut kinna kuana dar´kenna: dear oina haut gmoint, dös is a Buchstabn "T", wöi Terezia - ear haut scheinbar unnara Schwiegertochta g´moint. A annara haut denkt, dös is a Drachn! Na , a Drachn ho(b i mit Sichaheit niat daham, döa kuari fei(n scho bestätichn!
U sua is unnara Adventsfeia in Netschetin za End kumma. Miar ho(b a poar schäina Stundn mittarananna darlebt u aa woos für Erhaltung unnara Sittan g´macht!
|
|
|
|
|
|
