Hoimatspåziern gäihn 2012:01
Hoimatspåzierngäihn 2012:1
Zam „Schwårzn Teich“
Måla Richard
„Heint is uwa schäi(n“ ho(b i(ch möi(n sågn, ålls i(ch vam Fenzta assig´schaut ho(b: D´Sunna håut döi Wiesn am „Plachtaberg“ schäi(n rout g´farbt, d´Pfaa san durt schäi(n herumg´laffn u Wind woar aa koina(r. „`S is da Ua(n)fång vam neian Gouha, schau, dass a wenig spåziern gäihst!“ hout ma Söln g´sågt. Nu dou ho(b i(ch meina „Parka“ uazuagn, uwa a Mütz(a)n ho)b i(ch koina g´numma, ´s is doch schäi(n draßn! Ålls i(ch assikumma bin, ho(b i(ch niat gwußt, wou i(ch heit laffn soll. Uwa wenn i(ch dian „Plachtaberg“ uag´schaut ho(b, wöi ear in da Sunna sua schäi(n rout woar, woar döi Entscheidung troffn: „Heit gäi(h i(ch zam „Schwårzn Teich“. I(ch woar zam letzanmål durtn, åls i(ch sua zwölf Gouha ålt woar: „Ob i(ch dian Wegn nu(ch find?“ ho(b i(ch sua füa(r mi(ch denkt, åls i(ch vam Dörfl affi zam Wåld gånga bin. Dian kürzestn Wegh ho(b i(ch niat g´numma, waal dös z´kurz war. I(ch bin schäi(n Richtung Manetin gånga u erst, åls i(ch dian Kamm vam „Plachtaberg“ gseah ho(b, bin i(ch links uabuagn. Nou(ch sua drei hunnart Metan ho(b i(ch ua(n meina rechtn Hand sua fufzehn Meta(r houcha Föichtn g´seah. Åls i(ch dou z´letzt woar, woarn döi Baima sua oin Meta(r houch. Öitza bin i(ch dian Hüwl oina gånga: sua vüll Spuarn van Röi(h siaht ma(n niat sua oft. Aframål sia(h i(ch a schäina weißa Flechn: dös is dear “Schwårza Teich!” In Erinnerung woar ear a weng gröißa, uwa ålls Kind siaht ma(n hålt ållas a weng gröißa(r. I(ch bin a weng stäihn bliebn u ho(b dian G´stånk g´rochn: dear woar gleich, wöi vur vierzig Gouhan! Inzwischn ist´s dunkla wuarn. U kålt is es aa wuarn. Schnell wieda(r hamm!
