Haimatspåzierngäih(n 2011: 3

(Diesmal im Böhmerwald)

Heit wiard i(ch enk dazühln, wöi i(ch niat im Eghalånd, uwa im Böhmerwald spåzierngånga bin. Böhmerwald g´höiart aa zum Böimischan u deratswegn kua(r i(ch aa sågn, dari dort daham bin. Unna Firma håut a schäins va(r)gångana Gouha g´håttn u wenn´s imma(r sua gout aasgäiht, foar ma imma mit ållan unnan Leitn irgendwou hi(n u tou ma(n  schäi(n feian. Heia(r san ma(n niat ins Mährische g´foarn, waal es z´weit is: heia(r semma in Böhmerwald g´foarn. Eisenstein g´höia(r)t aa zu Ortschaftn, wou vüll Deitscha g´lebt ho(b)n. U dazou foarn P(i)lsna(r gern aa dort hi(n: wöi im Summa(r, sua aa im Winta. G´wohnt ho(b)ma am Belvedére, sua 900 Meta(r üwa(s Meeresspiechal. ´S Hotel is scho(n aa wenig z´ålt, uwa döi wunnaschäina Aa(u)sicht afm Groußan Arber is himmlisch! U dazou brauan sie aa ihr eichenas Böia(r! I(ch bin mit´m Auto hi(ng´foarn u wenn i(ch va da Hauptstråus å(b)böigt bin, ho(b i(ch  afframål an schäinan Kraizwegh g´seah.  „Dös mou(ch i(ch miar uaschaua!“ ho(b i(ch sua(r  füa(r mi(ch denkt. Nåuch´m Mittågessn semma a wenig spåziern gånga. ´S Wetta(r  woar wunnaschäi(n u miar ho(b)m dian Spåzierngång g´nossn. Umma fünfa woar in deara bekanntn Kirchn mit dian Zwiebelturm halicha Mess(e. Meina Koleginna san scho(n affi ins Hotel gånga, i(ch bin uwa bliebn. Nåuch dera Mess ho(b i(ch dian  Kraizwegh g´soucht u aa g´ funna. I(ch woar aloi(n, d´Vüachala  ho(b)n im Wåld schäi(n g´sunga u i(ch bin schäi(n langsåmm ålla döi fünfzeahna Stationan dian Barch affi gånga. Bei jeda(r Station ho(b i(ch füa(r ålla döi g´betet, döi i(ch kenn u bin mit gånz goutan G´füll zam Åubnessan kumma. G´schlåufn bin i(ch aa gout, u åls i(ch wieda Hamm kumma bin, ho(b i(ch sua füar mi(ch denkt: unna gånza Haimat is wirkli(ch schäi(n!