BERICHTE

´S is Feierobnd!
Måla Richard

Heint sitz i(ch daham u meina Gedånkn san  dreißich Kilometa weit wegh, am Netschetiner Friedhuaf. Nua(r poar Meta vam Gråb meina(r Måla Wawa kumma a neis Gråb finna. U in dian Gråb löigt ma Tata begråbn. Am 30. Jenna im Gouha 1936 is ea(r im Durf Špačince in da Slowakei af d´ Welt kumma. Bam Militär is ea(r zu nus kumma u håut durt aa meina Mama g´funna. U i(ch woar dös ersta Kind, wos af´d Welt kumma is. Mein Tata håuts sicha niat leicht g´hott, aa wenn sa(n Muttaspråuch der Böimischan ähnli(ch is(t. Ea(r håut möin mit schwara Årwat z´friedn saa, döi ea(r in SKODA – Werken gröigt håut. Er håut Stahlbleche verarwåt u sich daba Lunga kaputt g´måcht. Poar Gåuha spata is dazou a gånz ånnara Krånkat kumma u nåuch åcht Gouhan håut ihn Da Herrgott as seinen Leidn erlöist. Gesta(r)n ho(b)mma sich van ihn va(r)abschiedet. In unnara(r Netschetiner Kirchn san wieda nåuch vüll Gouhan d´Kirchnbankn vull Leitn wuarn.  Unna Pfårre(r František Liška håut fei(n schäi(n g´redt. „Enka Tata håut d´Leitn z´såmm g´feiat u woar immer friedli(ch“ dazühlte ea(r bei seina(r Predigt.  Dös ho(b)m mit Siche(r)heit aa döi vüll Leit gwußt, döi ihn af seinan letztn Wegh  begleitn ho(b)m. Bei da halichn Mess woarn Ministrantn seina Enkelkinna: wear håut heintzatågh sua ein Glück? Schåd nua(r, dari i(ch niat schäi(n laut singa ho(b kinna, waal i(ch gräint ho(b. Dös g´höiart aa dazou, waal ma åls da ältesta Bou öitza drua(n is. Ma Tata håut imma gern tånzt u aa gern g´sunga. Seina schöina Stimm ho(b i(ch g´erbt u am Gråb kuari nua(r sågn: „Löiwa Tata, dånk schäi(n niat nu für Deina  schöina Stimm, dånk schåi(n füar ålls, woos du füar mi(ch in deinam Leben g´måcht håust!“ U waal da Tata sua(r gern gouta Musik g´häie(r )t håut, ho(b) i(ch füar seinan letztn Wegh gånz wos schäins b´st(e)lt: Bis as Graslitz im „Arzgebirch“ is dånk Freindschåft die Blåskapelln „Horalka“ kumma. I(ch ho(b niat g´wußt, wos sie imma ban Beerdichungan spülln, waal i(ch döi Musikantn bei gånz ånnaran Festn g´höiart ho(b, uwa g´röihat woar i(ch fei(n gånz schäi(n, åls da Sarch im Gråb g´legn håut u a Liedl kumma is, wos ma imma unnaran Mitgliedan am Gråb singan: ´S is Feierobnd! Mei(b gungsta Bou stäiht mitn Kreiz am Tatas Kuapf, unnara schäi(n hergrichtete Kirchn stråhlt üwa(r Netschetin, d´Baima am Friedhuaf san suar schäi(n farbich u döi wül Leit betn füar unnan Tata! Löiwa Herrgott im Himmel: ich bitt dich schäi(n: nimm bitta meinan Tata za Diar! Döi letztn Monatn håut ear schwar leidn möin u håut mit Sicha(r)heit seina wenichan Sünden scho(n af´d Eardn ådeint. Füar d´Mama bitt i(ch aa schäi(n: h(e)lf ihr bitta aa; sie håut Diar Jåhrzentnlång in Deina Kirch däint u braucht öitza d´Hilf va Diar. Da Herrgott låu nan seligh rouha!

zurück